వాట్సాప్ వెబ్‌లో మ‌రో ఫీచ‌ర్‌

కంప్యూట‌ర్ లాగిన్‌కు ఫేస్ ఐడీ/ ఫింగ‌ర్‌ప్రింట్ అనుమ‌తి 

సోష‌ల్‌మీడియా దిగ్గ‌జం వాట్సాప్ త‌న వాట్సాప్ వెబ్‌, వాట్సాప్ డెస్క్‌టాప్ యాప్‌కు మ‌రో  ఫీచ‌ర్‌ను జోడించింది. కంప్యూట‌ర్‌తో యాప్‌ను లింక్ చేయడానికి లాగిన్ కావ‌డానికి వాట్సాప్  కొత్త‌గా సెక్యూరిటీ లేయ‌ర్‌ను జ‌త‌చేసింది. ఈ కొత్త ఫీచ‌ర్ ద్వారా వినియోగదారులు తమ వాట్సాప్ ఖాతాలను తమ కంప్యూటర్‌కు లింక్ చేసే ముందు ఫోన్‌లో ఫింగ‌ర్ ప్రింట్ లేదా ఫేస్ ఐడీని ఉప‌యోగించుకోవ‌చ్చు.ఈ స‌దుపాయంతో మీ అనుమ‌తి లేకుండా ఇత‌రులు మీ వాట్సాప్ ఖాతాను కంప్యూటర్లో ఓపెన్ చేయ‌లేరు.  

డెస్క్‌టాప్‌లో వాట్సాప్‌ను అనైతికంగా ఉపయోగించడాన్ని నివారించడానికి తన మొబైల్ యాప్‌లో అడిష‌న‌ల్ సెక్యూరిటీని జోడిస్తున్నట్లు కంపెనీ ప్రకటించింది. వాట్సాప్ వెబ్ లేదా డెస్క్‌టాప్ యాప్‌ను వాట్సాప్ ఖాతాకు లింక్ చేయడానికి, వినియోగదారులు ఇప్పుడు ఫోన్‌లో ఫేస్ లేదా ఫింగర్ ప్రింట్ అన్‌లాక్ ఉపయోగించమని అడుగుతారు. ఈ దశ పూర్తయిన తర్వాత, వినియోగదారులు ఫోన్ నుండి QR కోడ్ స్కానర్‌ను యాక్సెస్ చేయవచ్చు, అది కంప్యూటర్‌తో లింక్ అవుతుంది. రాబోయే వారాల్లో ఈ కొత్త ఫీచ‌ర్‌ను విడుద‌ల చేయనున్నట్లు వాట్సాప్ తెలిపింది.